مع حضره الجرح اللعين
وزمن معاند للغلابه الشقيانين
ورحيل مفاجئ للأمان والامل
رحل معاهم كل ناسنا الطيبين
ومعدش فاضل غير بشر متلونين
وكلام مذوق والوعود وامل معاهم
من سراب واحلام تعيشها من حناجر كدابين
تصحي علي وهمك كتير تلقاك حزين
وحيد مودع نعش جرحك بالأنين
ياخدك وجع علشان سبوك الكل في جنازه
جروحك راح رجع حتي اللي منك مش لقيهم موجودين
تاخدك دروب شايل همومك بين عيون كل البشر عمال تجوب
تندهه علي كل اللي كان جنبك حبيب صاحب مواعدك في المحن
علي انه عنك يوم يغيب تلقاك غريب تسأل ياناس هو انتوا فين
يحتار دليلك ليل نهار الكل باع تسال دموعك كل يوم طب اروح لمين
تصحي علي وهم اسمه ناس الكل علي جرحك ياغالي راح وداس
الكل ودع حضرتك افضل وحيد اخره حياتك راح تشوف المر ليك
وحدك في كاس ومعدش جنبك غير شويه كدابين متلونين
اتعلم الدرس الأكيد واعرف بانك مهما طالت دنيتك وسط البشر
هاتعيش وحيد والكل في ساعات المحن عنك ياصاحبي مودعين
ماتلومش غير نفسك وبس وبايد جنابك ع الجروح اللي في ضلوعك
روح ومس مين اللي بيك في الدنيا حس في وجع مصاحبك من سنين
ودع كلامهم اياك تصدق ان الدموع اللي في عيونهم وان الوعود متصدقين
الكدب دايما كان حاملهم هايغرقوك وهايسبوك دي عيون بتكدب محتالين
احصد طيابتك للجميع عناقيد وجع اصل بغباوتك كنت فاكر ان الزمان بكلام
مذوق باللسان عاد رجع لساك حكيم في زمن اليم وان اللي منك طيبين
ارحل بهمك روح بعيد واستني فجرك من جديد وان ماطلع فجرك في يوم
تبقي الحياه ملهاش لزوم واستني موتك ينصفك وارحل وحيد وقت السقوط
ماحد ابدا يعرفك وقول وداع للي في جرحك راح وباع حان الرحيل ياناااس قلوبهم ميتين ،حان الرحيل يااناس قلوبهم ميتين ،،،،،،،،،،،،،،،،،،،،،،،،،،،،،،،،،،،،،،،،بقلمي/ رافت يوسف 18/1/2016
ليست هناك تعليقات:
إرسال تعليق