ساعات بشتاق ليوم عشته
وانا صغير
وبحلم لو يعود بيا الزمن تانى
واعيش فى شقاوتى وجنانى
وكل الدنيا تنصحنى
وتصرخ جوه فى ودانى
وعمرى ما كنت بتغير
انا كان حلمى اكون عصفور
واطير بجناحى فوق الشمس
واحكيلها واغنيلها
واسمع منها مواولها
واشوف النور
انا عاشق نجوم الليل بقلب ابيض
وكاتب عشقى جوايا
حروف وسطور
انا حلمى
اعيش حلمى
وترجع تانى احلامى
لكن ايامى محسوبه سنين وشهور
انا شاطر من الشطار
الف الدنيا بسفينتى
واعدى بحار
وكان صاحبى الفتى بوجى
وكمان طمطم
وياما غامرت مع بكار
وكان بؤلظ يا دوب نونو
وماما نجوى تقولى يا إتش
تاخده معاك فى كام مشوار
واقول سامحينى ماما نجوى
دا لسه صغار
وموج البحر لو يعلى
بكون غدار
ولو هبت علينا الريح
تلاقى البحر ما له قرار
وابله فضيله كانت تحكى
قصتها
تسلينا ونستمتع بغنوتها
ولما كنا نعجبها تقول شطار
ساعات بحلم بيوم عيشته وانا صغير
والف الدنيا بسفينتى انا و بكار
بقلمى / هشام عبد الجواد مشالي
ليست هناك تعليقات:
إرسال تعليق