صمت.وكلام.com ***بقلم..محمد عسل

صمت.وكلام.com

لما الكلام مره إختلف ويّا السُكات.. 

قال الكلام وسط الجميع بعض الحاجات..

قال إنُه قادر يحمي ناس من حُزنها..

وكمان بيصبح فضفضه تنهي الآهات..

قال إنه قادر يجي يقعُد ف الفَرَح... 

يمسك إيدين الضحك يرقُص بالساعات..

قال إنه قادر ف الخصام يجمع قلوب بعد الشَتات..

قال إنه قادر يجي يسكن ف الكُتب..

قال إنه قادر يبقي شِعر وأُغنيات..

لسه الكلام قاصد يزِّين حضرتُه..

فاتح لصدرُه صوتُه عالي وضحكتُه..

عَمال بيطحن ف السُكات

والصمت ساكت ما نطق وسط الجميع ..

قاعد رَزين...

ورزانتُه شئ ضمن الصفات..

قام الخِناق قال السكوت دا مُنقذي..

وقت الغضب سهل الكلام صعب السُكات..

قام الكسوف قال السكوت هو الحَنين..

هو الجمال وعلامتٌه فوق خد البنات..

لسه السُكات صامت وهادي حضرتُه..

رافض كلامُه رغم كل الممكنات..

الوِد قام رغم الخلاف قال المُفيد..

إن الكلام أوقات كتير بيكون جميل..

وإن الجمال أوقات يكون معناه سُكات.

بقلم..محمد عسل