إلى ستي ...
شو أحكيلك ياستي ..
وشو أشكيلك بعد مارحتي
الربيع صار ربيعين
والحُلم صار حلمين
اربع شتويات
وخامس صيف
والفصول دايرة
ولسى منترجى بس ياحيف
شو أحكيلك ياستي؟
الامور ياستي بعدها مثل ماهّية
ألهم المناصب والكراسي
وألنا بردات الشتوية ..
ألنا المصايب والمآسي
وألهم طلتهم البهيّة ..
خبريهم ياستي ...
أنو تعبنا ،،،
والحلم مثل طير بالسما طار
وأنو الوضع
مثل ورق الخريف والغار
واحنا ياستي
بين سنديان العروبة
ومطرقة الغربي
يلي علينا حاكم صار ..
شو أشكيلك .. ؟
يمكن بكرا ياستي ويمكن لا
يمكن بعد بكرا نخلص
قبل ماتخلص الحياة
يمكن الحلم يرجع
بس الحلم ياستي
راح يبقى حلم
والآه راح تبقى آه
بس ياستي لاتنهمي ..
استريحي ونامي
من قبلك نامت أمتنا العربية
بتمنى ازورك بمنامي
واسقي قبرك
اسقي الحبق
والوردات الجوريّة
اقرأ الفاتحة ألك
ولأوطاني مثل ماقال الشاعر ياستي
في يدينا بقيَّةٌ من بلادٍ
فاستريحوا كي لا تضيع البقيَّةْ
عمار الحريري
ليست هناك تعليقات:
إرسال تعليق