وشوشة وبدأت الحكاية بوشوشة
وكلمة حروفها مبعترة ومتشوشة
قال لى بحبك وكنا ساعتهافى الشتا
وما بين ايديا حاضنة شنطة مدرسة
وضفايرى طايرة فى الهوى سابقة
ولاد المدرسة ..قالها ومشى
زى لسعة برد تنزل فى ليلة صافية
مشقشقة...ورجعت بيتنا مزقططة
والكلمة جوايا عملت معركة مابين أفرح
ولاأحزن ..بصيت لقيت فى المرايا
بنت حلوة متزوقة ..كبرت بقى
والشجرة خضرة مورقة
ومرت سنين والحب يكبر باللقا
والدردشة..وفى يوم قابلنى
فى الميعاد ولقيت عيونه بالدموع
مغربة ....ومشرقة وسألت ايه اللى
جرى واللى حصل ..قال مسافر
الدنيا بقت زحمة هنا والكل طاير
فى السما ومفيش مكان على الارض
حتى يضمنا وبقينا زى سردين
فى علبة معشقة ونجيب منين فلوس
للقمة فى فطار ولا عشا!!!!!!
العيشة صبحت ضيقة وصبحنا ياعم
ملطشة قوللى بقى بقالنا كم سنة
متخرجين وعلى الرصيف بنبيع جرايد
وشبعنا من الطرطشة وفين أحلامنا
ماتت زى أيامنا اللى كانت زى شجرة
مفرعة ومصفصفة ...فى الصف واقفين
طوابير ورغيف العيش فى قلب النار
علينا يبكى بعيون متشحتفة لحد ما
قلبه اتحرق زى أحلامنا اللى كانت زمان
متكلفة...شفت بقى؟؟؟؟؟؟؟؟؟
ولقيت دموعى فوق هدومى متغرقة
والطريق تحت قدامنا مشققة
وكل الوشوش صبحت رطوش وأصوات
متشوشة ..ومشى ولا عارفة حتى
ان كان مشى وكلامه كله اتنسى
أتاريه همس ..وقال مسافرمن غير
ماأسمع أى حروف متوضحة
وأقول دى يمكن....... فضفضة
فى ساعة رضا ...لكن ولا لقيت
أى صدى والدنيا حواليا فضا ولقيتنى
وحدى ملبشة خايفة كدا والريح تصفر
أتنفض أجرى عليه ..سمعت صوت
بوشوشة ..واقفة تكلم نفسها ؟!1
فى البرق دا...... وتحت الشتا ؟؟!
أتاريه مشى ..والحكاية ابتدت ..
وانتهت ..........بوشوشة
ليست هناك تعليقات:
إرسال تعليق