(بقينا كبار)...بقلم..محمد عسل

جـذور الشَـــعر مش نافِـع لها صَبغَــه..

هتفضل بيضَــه لجل تكون لِنا إنـذار..

وطقم سناننا لو يطلَــع مع المضغَــه..

دي ألف رسالــه معناهـا بقيـنا كبــار..

عامــود الضَهر لو مَتني مع المشــيَه

أكيد ف السِكـه هانجَلي خطاوي كتــار..

وضَعف نظرنا لو يلبس لمِيت عدسَه..

هايبقي طَشاش مهوش واصل يادوب أمتار..

ورعشــة إيدنا لو تِظـهر مع اللمـسَه..

هاتوصِف ضَعف جسم يبان ف أي حـــوار..

وكل ما فات بيوصف دِنيا مش دايمَه..

وكل ما فات بيوصف عُمر مَر وطــار.. 

وكل ما فات بيوصف إننا لازم...

لباب التوبـَه نتوجِه بدون أعــذار... 

ولا نِرضَي شيطان يـفرح ويهزمنا..

ولا نيأس ما دُمنا بنعـبُد الغـفار..