..
تحت لوحه إرشاديه..
شوفت إعلان الوظيفه..
الشروط كانت عاديه..
كات عاديه..؟؟؟؟
آآآآه عاااااديه..
يعني فرصة جت نضيفة ..
والمهيه..كتير لطيفة..
حاجه كات فوق الخيال..
قولت ده رزق العيال..
بكره تحلي وتبقي عال..
عيشتي تبقي ميه ميه..
ينعدل حالي إللي مال..
إستفيت كل الشروط..
خدت بعضي وروحت جري..
إسمك إيه.. سنك كام..؟
كام سؤال مافيهومش هري..
المهم..
إني مستوفي الشروط..
وإني جااااايز أتقِبل..
واني خايف برضه أموت..
أو في مُخـي اتهٍبل..
مش مصدق..
طيب إملا الإستماره..
سعر رمزي 100 جنيه..
رمزي مين..؟؟!!!
رمزي ياخد مني ليه ..
100 جنيه...!!!!!!!
إنت بتهزر يابيه.؟؟.
فجأه لقيتني ببُص لروحي..
صِعبت روحي كتير..
علي روحي..
وشيطان شاطر..
يلعب بيا..
الشغلانه تضيع من إيدك..
وتفوتها علشان 100 ..؟؟
أما عقول تعبانه غبيه..
طب دي مهيه..
عدت لها 2000 بشويه..
طيب .. ماشي ..
بكرا الأكل ح يبقي بلحمة..
كله طواجن .. كله محاشي..
تبقي الحالة غير الحالة..
وإوعاك تاخدك يابني جلاله..
إثبت يلا وقدم ورقك..
أصل مافيش دلوقتي عِماله..
ولا تعيش علي أهلك عاله..
إدفع ياللا الـ 100 وخلص..
بطل كتر كلام وقواله..
عدي يومين وتلاتة وعشرة..
لاجواب جه..
ولا ذاعوا ف نشرة..
أما دي كدبه .. أما دي فشره..
وأتاري الشُغلانة بلالة..
طلعت نصبه.. وإشتغاااااله..!!
..
بقلم : ولاء عدنان
ليست هناك تعليقات:
إرسال تعليق