&& تخيلت انى ام وابنها غائب عنها &&
ولكن هذا فعلاً واقع مرير (( الغربه ))
***************************************
عامل ايه فى الغربه يا ابنى ؟
يا ابن قلبى وحشتنى
بدعيلك كل يوم ياروحى
ليه يا ولدى سيبتنى ؟
&&
عندى حلم كبير يا غاليه
نفسى مره احققه
ايوه يا أمى الغربه مره
بس الأيد قصيره ياما
وحلم عمرى بعشقه
&&
بس عيونى دبلت منى
تعبت من كتر البكا
محرومه من طلتك
قلبى سبقنى واشتكى
&&
سامحينى نفسى افرحك
وللضحكه اقدر امنحك
انتى امى ونور عيونى
ادعيلى ارجع اسعدك
&&
نفسى اشوف عيالك يابنى
ماليين عليا المكان
اهلك واخواتك ياروحى
سألونى عنك والجيران
&&
مش باقيلى غير دعاكى
ودمعى من بين الحيطان
ابص عليكى انتى واهلى
سلميلى على الجيران
طمنيهم عنى يا صابره
وحشنى حضنك والحنان
نفسى ارجع تانى اضمك
واخدك ياما بالأحضان
&&
حكم عليا الزمن ياولدى
واتفرقوا منى الولاد
ليل نهار ناعيه همك
وبدعى لرب العباد
يسلمكم ليا يا ابنى
وترجعولى سالمين
ياما كان نفسى اسعدكم
ولا اشوفكم يوم متهانين
&&
الأهانه مش موجوده متخافيش
هسيبك واقفل شويتين
بس اوعدينى متعيطيش
&&
حاضر يابنى بس اوعدنى
تحافظ على نفسك أكيد
دمك بيجرى جوا دمى
فى الشريان وفى الوريد
&&
قفلت مع امى حبيبتى
وكنت ببكى بالدموع
خبيت عنك حالى يا أمى
أنا فى الغربه موجوع
حتى شغلى مرار ورايح
اتوه فى بلاد غريبه عنى
انتى فين يا مصر منى ؟!!
توهت عنك وعن أمى
&&
آآآآه يا بلدى خيرك ياما
وسارقينه كل الكلاب
وعذبونى فى غربه صعبه
ودا حال اغلب الشباب
ولما كنا عايشين فيكى
داست علينا الظروف
معرفناش ناخد حقوقنا
وصفعونا بالكفوف
هربنا منك غصب عنا
وهى دى كل الظروف
&&
قفلت معايا يا ابن بطنى
حاسه بدموعك بحور
نفسى افرح بيك يا قلبى
وجنبك بدر البدور
بنت بتحبك اوى
تساندك مهما الزمان يدور
&&
مهرها غالى يا أمى
لكن هيا بتحبنى
نفسها تسعدنى جداً
لكن ظروفى بتهدنى
ادعيلى بقلبك يا طاهره
انتى تاج فوق الجبين
ارجع واتجوز حبيبتى
بنت الناس الطيبين
&&
داعيالك بكل حرقه
وقلبى هيتجنن عليك
نفسى المس تانى ايدك
نفسى ابوسك من جبينك
نفسى اضمك جوا قلبى
نفسى اتكحل عليك
نفسى بأيدى اشيل عيالك
نفسى اشوف فرحة عينيك
&&
آآآآآآآآه يا قلبى هموت يا أمى
ولا اشوف فى يوم دموعك
قلبى بيوجعنى يا أمى
خبينى مابين ضلوعك
صدقينى ليكى هرجع اكيد
ربنا يطول فى عمرك
وتشوفينى انسان جديد
انسان مليان بالأراده
عنده قوه من حديد
مهما كانت الظروف
هتحداها بالتأكيد
&&
نفسى اشوفك لابسه ابيض
وموجوده فى اطهر مكان
تدعيلى والفرحه تكتر
وآخد حبيبتى بالأحضان
نفسى اعوضكم يا أمى
نفسى اعوض الحرمان
ايوه هرجعلك يا أمى
يا نبض قلبى انتى الأمان
#أميره شقير
ليست هناك تعليقات:
إرسال تعليق