قصيدة
-----------
[ مشتاقلك يا ضحكه ]
------------------------
للشاعر / محمد عبد الفضيل
-------------------------------
ومشتاقلك يا ضحكه
تعودي .. من تاني ..
تغطي الرمش فوق العين
دا أنا اللي عشت وحداني .
وشاب شعري كده ف سنتين ...
يا فرحه فين . طريقك فين .
وليه دايما مخاصماني ..
أجيب لك بس وش منين
دا انا اللي الدمع غطاني ..
ومهما قلت آه ياني
دا فاتني الحظ ورماني ..
ومش راجع كده تاني
ومهما الهم يوجعني
مفيش ضحكه بترجعلي
ومين يقدر يرجعني
يضحكني .. يزغزني
يرقص رمشي فو ق العين ..
أجيبه منين ..
دا ساعة حظي وحشاني ..
كأن الهم يعشقني
وبحموله بيشنقني
وساعة فرحي . يطلعلي
يكلبشني .. يكتفني
ويعمل فيها سجاني ..
ما بين صفين من اللولي
سناني الباقيه وحشوني
بعضعض في الرغيف وأكسر
وبملي معدتي وأحشر
وبتحسر علي سناني ..
وضهري مال
كما الخلخال
بيترقص علي اكتافي
بقيت حافي
من الأفراح
كما كروان فاقد أصداح
يا أرض براح
نفسي فيك أنام وأرتاح
ولا أنتي برضه كارهاني .....
---------------------------------------------------محمد عبد الفضيل --------------
ليست هناك تعليقات:
إرسال تعليق