( 1 )
مش عاجبني ايوه
مش عاجبني
إني إتولدت في وسط ناس
لو عملتلها خدي مداس
هابقا برضه مش عاجبها
ولا إفادة من علام
مليان حشو وركام
وورقة بيضا في برواز
تمنه أغلى من الازاز
متعلقة ع الجدار
تشهد عليا إني حمار
مش عاجبني ايوه
مش عاجبني
( 2 )
أبن بهية ناجح فاشل
في التوجهيه
مش دي القضية
يمسك زمام الدايرة ديا
يمسك عصايا ويهين كرامتي
وازاي يبقا سلطة رسمي
محجوز له كرسي
ماأنا برضه زيه
أمي بهيه
مش عاجبني ايوه
مش عاجبني
( 3 )
اني اروح الشغل بدري
واللي جنبي غياب وتعدي
مشفش وشه الا وجنابه
يقبض حسابة
ايه اللي جابه
حاجز مكانه
تقلش ورث اهله وجنابه
مش عاجبني ايوه
مش عاجبني
( 4 )
ان المدرس خلاني افلس
وياريت يعلم ولا يدرس
نسي رسالتة وحتى عيلتة
كل اللي فاكره الكادر وبس
واقف مراقب مين اللي طالع
مين اللي نازل والغش وش
مش عاجبني ايوه
مش عاجبني
( 5 )
لو حد عاجبه طب ايه دليله
يقولي عنه وأشيل جِميله
بحب بلدي وأعشق ترابها
بشكي حالي ومش ضلالي
أوعاك تفكر إني كَاَرها
مش عاجبني ايوه
مش عاجبني
( 6 )
لو بختي مال أو حظي عال
بلدي صامدة بعزم الرجال
لو ع الاماني يبقى كلامي
شعر واغاني ليكي انتي
بحبك مش حد تاني
مش عاجبني ايوه
مش عاجبني
بقلم / #يوسف_عبداللطيف
من قصيدة انسان
ليست هناك تعليقات:
إرسال تعليق