.................................تابع القصيدة العامية....................................
.............................. ( تومياتي مع ميالة ) ...........................................
( 3 )
لسة
مُصرّة
تميلي
يا واخدة نهاري
و مدّياني ليل
مش ليلي
لسة
مُصرّة
تميلي
و تقولي
و تعيدي
يا مستنية قولي
بلاش تميلي
و حافظي
علي سكوتي
و بلاش
تستني قولي
الكلام لو اتقال
مش هيبقي
علي كيفك
و لا كيفي
لسة
مُصرّة
تميلي
و تجرجريني
و تجبريني
اكررلك قولي
صوتي اتنبح
و قلبي غالي عليا
مش عاوزة
يدبح
اصل الحب
عاوز الف صوت
علي صوتي
اصل الحب
بيحب
كتر الكلام
و انا في الحب
بحب
سكوتي
و يحب الدهب
و التعب
و اقلام و كتب
و جوابات و اشعار
تقرا وتكتب
و انا يا دوب
اللي ف ايدي
علي اد قوتي
لسة
مُصرّة
تميلي
الحب ياما قتل
بنات زي الورد
و انت وردة
خسارة في الحب
تموتي
يا اللي شايفة
المستخبي
و سامعة سكوتي
سيبك من خطوتي
و فوتي
و قولي
يا واخد قلبي
يا ناوي
علي موتي
يا واخد عقلي
يا ناوي
علي قتلي
يا واخد ايدي
يا ناوي
تكون سيدي
يا ميالة
ميلي
في الشوارع
و عيدي
و سيبك بقي
من طريقي
لفّي وارجعي
و اوعي
ف يوم تزعلي
عارفك من ميلك
بنت خفيفة
زي الوردة
لما يحمّل
عليها الندي
تميل زي ميلك
سيبك
بكرة تقولي
و ايه يعني
هقابل غيره
و يشوف ميلي
زي ما شاف
ميلي
و يقابل غيري
و شِعره يطلع
و يقول ويعيد
و يمكن كمان
يقول فيها قول
احسن من قولي
يا ميّالة
من غير ما تقولي
انا عارف قولك
بتقولي .....
انا سِته
و صاحبة فضله
و كفاية ان شِعره
طلع علي ايدي
سمعت قولك
من غير ما تقولي
منكرش ان شِعري
طلع علي ايدك
بس مين غيري
طلّع شَعره فيكي
و قال قولي
و قالك
ميلي
ميلي
يا ميّالة
ميلي
علي غيري
ميلي
و بلاش تستني
قولي
و ميلي
وميلي
و ميلي
’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’
للقصيدة بقية
كلمات .... احمد فارس الينايري
.................................................
ليست هناك تعليقات:
إرسال تعليق