قصيدة أنا اليتيم / صلاح الصغير

قصيدة أنا اليتيم

...................

يا اللى زرعتى وغرستى 

يا اللى رعيتى وحفظتى

يا اللى ربيتى وكبرتى

من بعدك أنا اليتيم

....ــــــــــــــــــــــــــــــ....

سافرتى يا أما ولا ودعتى

لمكان بعيد عنا وروحتى

يا مجمعانا فى اللمة ولا فرقتى

صبح المكان من بعدك جحيم

...ــــــــــــــــــــــــــــــــ.....

بنور عيونك لدنيانا نورتى

وأحلى كلام من حكمك نصحتى

سهرتى وتعبتى ولا يوم إرتاحتى

وبحالك يا أما ربنا كان وحده عليم

....ـــــــــــــــــــــــــــــــــــــ...

من بعدك بقيت أنا اليتيم

بشوف نور الشمس تعتيم

والليل يطول بالفكر والتنهيد

والبشر يا مخادع يا لئيم

....ــــــــــــــــــــــــ......

يتيم يا أما نسيت الفرح من بعدك

ما الفرح يا أما أصله من عندك

عمرى ما فكرت فى الفراق البعيد

لكنه كان قريب قطع سبيل وردك

......ــــــــــــــــــــــــــ...........

عارفه يا غاليه أنا كبرت وشعرى شاب

وبحلف لك من بعد فراقك ما عشت الشباب

وعايش وسط عيالى شارد حزين ووحيد

ودايما بدعى ربنا نتقابل يا أما لقى الأحباب

......ــــــــــــــــــــــــــــ...............

هفضل أنا اليتيم لغاية ما نتقابل من تانى

هفضل يتيم ف لقائى أملى وكل الأمانى

ماهو من بعدك مافى شىء جديد

الا همومى وغلبى وشجونى وأحزانى

.....ـــــــــــــــــــــــــــــــــ.............

وأنا على قبرك دموعى بكيانى

وصدقينى يا أمى بقت هى كيانى

وقلبى وحدانى عايش فى صندوق حديد

عايش مابين ذكراك ومابين دمعى وحرمانى

.....ــــــــــــــــــــــــــــــــــ..........

أنا اليتيم اللى ما تت حياته من زمان

اليتيم اللى صوته قهر فى الكتمان

أنا اليتيم اللى صلاته كلها ترديد

أنا اليتيم يا أمى فى عالم التوهان

.....ـــــــــــــــــــــــــــــــ.......

من غير أسامى مافيش داعى

لإن الإسم بيصحى أوجاعى 

لما كانت تنادى ع القلب الحديد

ده موت الأم هو هو موت الحامى والراعى

.....................

أنا اليتيم