صلاح القناوى
من ألبوم صورى
.........................
1000صوره و1000وش
اللى مالين ألبوم حياتـــــــى
صور فيها بخاف وأكـــــش
وصوركتير عن ذكرياتـــى
شوفت ناس تنهب وتنهش
وصورهم كبيرهم بيطاطى
ناس ما بتلزمش ولا بتهش
بس صورها فى ألبوماتــى
وصور عنها ما أستغنتش
ناس ضروريه فى حكاياتى
و أحلى حاجه أمى مابتفارقش
صورتها أى لحظه من أوقاتى
اللى كانت تسهر ولا تنامش
إلا لما تشوف إبتساماتى
وبصراحه هى احلى وش
صورة بتحيى جوايا مماتى
أما أبويا وصورته ماتعبش
هو إحساسه عنوانه تضحياتى
وصورة بيقولى ماتخافش
بيبنى فيها طموحى وأمنياتى
وصور’ إخواتى طيور العش
إخواتى سندى ومدادى
صورة صاحبى ما أرتاحش
إلا وإحنا حاضنين الأيادى
صورة حبيبتى جميلة الرمش
اللى سهرانه فى قلبى ليلاتى
يارب منها أبدا ما أتحرمش
لإنها ليا الماضى والأتـــى
أما صورة بلدى ماتتوصفش
صورة سكنت فيا حركاتى
وصوره أوطانى ماتستغربش
صورة صرخ فيها سكاتى
وأهى صورما بتتكلمش
بس هى سبب دموعى وسهادى
ونعيش مع باقى الصور
1000 صوره و1000وش
......
صلاح الصغير
القناوى
ليست هناك تعليقات:
إرسال تعليق