أنت مين ..................؟؟
ــــــــــــــــــــــــــــــــــــــــــــــــــــــ
خايف أقول اللي في قلبي
تجرحني عينيك بسهادها
ولا ضحكة من شفتيك
يدوب وياها عمري
أنا خايف من لوم العزال
أنا شايف حبك موال
أتغني بيه ليل ونهار
وبخاف أقول اللي في قلبي
أحسن يوم تزعل مني
وتفتكرني بشاغلك
أو برسم صورة في قلبك
عن فارس مهزار
راكب حصان الليل
شايل سيف طويل
بيحارب طواحين الهوا
لا والحق أقول
انت جوايا قرار
يمكن له بداية
بس نهايته بعيدة
وملامحك خريطة مشوار
اترسمت بين ضلوعي
حبك فردلي قلوعي
طرت وأحلام الصبا
هبت من غير ميعاد
أتمنيت ألحانك تطربني
وأغوص في قلب الأشجان
أنا حاسك كلمة حايرة
وسط طوفان الكلام
وبشوفك همسة شاردة
هربت من بين الشفايف
ولا انت آهة لوعة
بتفتت الأوصال
أنت مين قولي
في زمن الضياع ؟
دمعة حانية ولا فتنة وصراع !!
أنت مين ؟....أنت مين .. . ؟
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
بقلمي / محمود مسعود ( عامي ) 4/4/2016م
ليست هناك تعليقات:
إرسال تعليق