خلاص خلص منا الكلام
والحبر جف من القلم
ملحقناش نشكى الآلام
واتكسرت فينا الهمم
إبعد بعيد عنا ياخوف
القلب مليان بالحروف
اتشبكت قالت سلام
واتغيرت طلعت حطام
الشمس رايحه للغروب
مفاضلش غير ساعه يدوب
والليل معلمنا السكات
يسمعنا أصوات الآهات
صرخه مكتومه هناك
امل بيشرف ع الهلاك
وانين مصاحباه الدموع
مركب واتكسرت القلوع
يا أمى أومى وكلمينى
السكه تاهت عن عيونى
الضلمه مخبيه حاجات
والضمير فى قلوبنا مات
مش لاقى فتحه تعدينى
أسلاك وعسكر بتنادينى
يافته بتقول هنا ممنوع
والطريق مفيهوش رجوع
أروح فين و آجى منين
أنا من غير أسوار سجين
ليست هناك تعليقات:
إرسال تعليق