روحك ويا روحه والعشق اتضفروا
صبحوا كيان لمحه الحسود استنكرو
عقله وجوارحه فضلوا ياما يدبروا
اطلق ضوافره تحل الجدايل للأبد
مالت البنت
نخ الولد
نتجت روحين متعرجين
حل الضفاير إستحاله يستقيم
ليه تلضمى بواقي حلمك بالسراب
حتى الغياب
مبقاش يقين
روحك وروحه والعشق صبحوا مشردين
نظرة عيونه فى الفراق
نظرة عيونك فى الفراق
لحظة ما ضاع أخر أمل
الحزن صار لا يحتمل
وحرام عليكو الاشتياق
كان باقي شهر ويكملوا السبع العجاف
مبقاش يخاف
قلبك خلاص يوم الخلاص
اصبح حجر
كل البشر
دونيهم حبر جاف
يا اللى انتي قلبك بعد جرحك قد قوى
دمع روحك مع جروحك لو يستوى
هيصب نهر من المشاعر والكلام
نبت القصايد منك انتي هيرتوى
ليه لايمة وجعك ع الزمن
ومشككة ف عدل الاله !
سوء اختيارك له تمن
ف المحنة لن تقف الحياه
صعبان عليكى روحه هو يا صبية
انتي صابرة
انتي جدعة
انتي قوية
رغم السنين متبعترين
رغم الانين
رغم انك الضحية..
تشكي همك للقصايد
يشكي همه للسجاير
مهما كان البعد زايد
حلمه يجدل فى الضفاير
والادين اللى تحل
جدل روح مع روح وعشق
والضمير اللى يذل
قلب بيطالب بحق
حلمه يعلم انه ظالم
ولا يندم ع المظالم
نفسه الحسود يمنع ضوافره
تنهش العشق وضفايره
امتى يقدر؟
الله عالم.
#ضفاير
#ضحى_أحمد
ليست هناك تعليقات:
إرسال تعليق