خدها الغراب ................
ـــــــــــــــــــــــــــــــــــــــــــــــــــــ
من جوايا أنا اتهزيت
من جوايا مابقيتش أنا
حتى الحلم بقي يهرب مني
تصاحبني في ليلي الكوابيس
ازاي أعيش ....؟؟
وأنا أوهامي ملضومة في بعضيها
أخرج من نقرة أقع في دوحضيرة
الحنية فين ألاقيها ...؟؟
أرجوك ما تقوليش
ياللي بتسمع بكايا
إن بكرة أحلي
أنا عايش ميت بكرة
ولا بيجيش
ماملكش غير الدموع علي حالي
والوحدة هي موالي
غلبت ولا بيديش
هناك ......
بعيد .......
أضواء بتلمع
ناس بتتلمع
علي حساب ناس
بتدمع
هوإحنا في زمن الحرافيش ؟!!
اللي راكبة الموجه
صاعدة فوق جتتنا
دايسة علي رقابنا
بيقولوا أسيادنا ....!!!
كل ما ندور علي حلمنا
مانلاقيش
يا مجمع الآهات
يا موكلنا السكات
كفاية العمر فات
بندعيك وأنت مابتجيش
لحد أمتي موال العجز
لحد أمتي قول بس
غلبنا آهات
تعبنا سكات
وأنت في كرشك هات
أموال منهوبة
أملاك مكتوبة
دفعين مهرها دمنا
أنت مش مننا
خلتنا نقول الآه
من جوه قلبنا
كتفت بطمعك حلمنا
وقعنا ملناش ذنب
الحيرة بتضمنا
حضنين حلمنا
لحد فين يازمان
مبقاش لينا مكان
غير بس نعيش الأحزان
علي دنيا رسمناها
علي عيشة اتمنناها
خدها الغراب وطااااااااااار
ـــــــــــــــــــــــــــــــــــــــــــــــــــــــــــــــــــــــــــــــ
بقلمي / محمود مسعود ( شعر عامي
ليست هناك تعليقات:
إرسال تعليق