(إحنا العرب)
إحنا العرب
أهل الطرب
أهل الكلام
أهل الأرب
لا بننشتم
ولا ننضرب
كل شئ بنجربه
وبننكره وبنشجبه
مع إننا
وبدون خجل
كان ينضرب
بينا المثل
-----
احنا العرب
كنا زمان
مثال أدب
دلوقتى ليه
ياللعتب
على بعضنا
يوم ننعدل
يوم ننقلب
مع اننا
كل التاريخ
يشهد لنا
أصل الحضاره ملكنا
------
إحنا العرب
أهل الحسب
أهل النسب
متنعقرين
من غير سبب
على أي شئ
بنقول آمين
أبا لهب
وكإننا مستسلمين
مع إننا
من أي حاكم نتحلب
------
إحنا العرب
منجم دهب
وبالسهوله نتنهب
على بعضنا
زي الأسود
لكن نعاج
عند الطلب
ف الهايفه
نعمل مشكله
ولو اننا
إحنا أساتذه ف الأدب
-----
ياهل الحسب
ياهل النسب
مره واحده إسمعوا
سيبوا الخلاف اتجمعوا
إنسوا مره الغضب
شعوبكو عانت م التعب
فوقو مره وافهموا
النعش اصلا من خشب
السوس ح ياكله
لو هو حتى من دهب
(نبيل الوردانى)
ليست هناك تعليقات:
إرسال تعليق