كية الفقر
نصبر ل الجوع
ضرب الضلوع
من الهند مصنوع
والفت نمشي راسي مرفوع
يهمك انا اش من نوع
هل الحق حسبوني فهد
هل الباطل حسبوني جربوع
عماهم الطمع تاجروا ف الممنوع
يمشي ف الزناقي مخلوع
الخوف ف القلب مزروع
قالوا ناس زمان
الزواق يطير
البس الدهب مع الحرير
جمع المال الكثير
سكن الفيلا ركب رانج روفير
ركب الطيارة وطير
شري ارض زعير
سجلها عند النوطير
انا الفقير ولد الفقير
ف القلب حب الوطن
عندي احساس عندي ضمير
السكنى براكة ديكورها قصدير
الاخلاص هو الاساس
ما شطحنا ف اعراس ما ضربنا بندير
خوفني هول القبر
بقيت ف الاجل نفكر
الله اعلم شحال باقي ف العمر
يمكن عام يمكن ساعة يمكن شهر
لبست لباس الوقر تحزمت ب الصبر توسدت الحجر
طلقت الدنيا اعطيتها ب الدهر
فهموني يا ناس باغي نعيش حر
نقاسي العداب نمشي ع الجمر
انت دير بوق طبل وزمر
شرب الحليب كل التمر
بين الحق والباطل شبر
خد العبرة من قارون طغى وتجبر
سبحان من خلق بحر سما وبر
رزق ف الارض الطير والنسر
رزق الحوت ف البحر *
زجال الغرب
حسن البرارحي
سيدي يحي الغرب
ليست هناك تعليقات:
إرسال تعليق