لنقد العام - قصيدة ( بعد الموت ) الجزء الأول - سبتمبر 2016
....................................................................................
مفتتح
ف لحظة الصمت
كان هيضييع
وانا عارف حبيب قلبى
وأفعاله بتسبتلى
بإن العمر لو عدى
اكيد هيبيييع
****************
كتبتى النعى أستنى
أنا راجع من الأموات
ومش هاقبل تقول لى مات
دموعك مش هتبعدنى
وصوتك مش هايكسرنى
أنا راجع عشان أعرف
شعورك لما تخسرنى
ونومك لو بعيد عنى
هاشوفك من بعيد لكن
خيالك جوه ف الننى
أنا ميت ف دوامتك
وباغزل بالعبير أسمك
أنا راسمك
وراسم قلبى وياكى
قدرتى تخرجيه منك
هايدخل تانى جواكى
ويتسرسب ف شريانك
رضيتى ولا مارضيتى
هاغير لحن أوقاتك
ومش هاتخلى عن حبى
لحد ماترقدى جنبى
وابص ف وشك المرمر
وأقولك حبى كان أكبر
ولا فكرت اتغير
برغم إنك خدعتينى
اسيبك شهر ألقاكى
بتتسلى مع غيرى
وقلبى ف التراب ساكن
وقلبك ف البراح طاير
ولا فكرتى فى زعلى
ولا جيتى تصالحينى
رضيتى إنى أموت وحدى وسبتينى
رسمتى الحزن على خدك
بلون بارد وبعتينى
تعالى ارقدى جنبى وسلينى
ياست الكل أنا عايزك تضمينى
يا اجمل من رأت عينى
فى بعدك قلبى تاه منى
ولون القبر مش لايق
على عينى
أمانه تصبغيه أحمر
عشان أقدر أعيش ليلى
واتعود على الضلمه
وأنســــــــــــــــاكى
وتنسينــــــــــــــى
احمد رشيدى عبده - سبتمبر 2016 - بعد الموت - من ديوان صبر الحروف
.......................#وعجمى
.......................#كتبتى-النعى
ليست هناك تعليقات:
إرسال تعليق