::: بعد الفراق ::::عمادالدين العيطة:

::: بعد الفراق :::
::: أشعار :::
:عمادالدين العيطة:
هنا ياحبيبى .. هنا
وقفت أفتكر .. يوم
ما إفترقنا من سنة
لسة المكان .. نفس المكان
حاضن جراحنا وحزننا
وسامع صداه ..
بيقول ليه تاه ..
من بين إيدينا فرحنا
جوايا أه .. أنا والمكان
والحنان ضاع من أرضنا
باع عمرنا
وقفت أفكر .. إزاى بس هقدر
أعيش تانى سنة .. بمر الفراق
وإنت بعيد عننا ..
ماكفاية قلبى داق مر سنة
وكفاية سنة
هنا ياحبيبى .. هنا
عدت سنة ولسة ..
صوتك فى المكان
مالى المكان ..
لسة ملامحك ع الحيطان
لكن الأمان راح من هنا
من يوم غيابك
من يوم بعادك وأنا ..
باأجى هنا .. وعليك باأدور
وأتمنى اشوفك ..
وأسأل عليك كل ..
شى لمسته بإيديك
أو حتى شفته بعيونك
ألاقى كل شئ حزين
كأن السنة فاتت سنين
وإنت بعيد عننا
حتى النهار أصبح سواد
والشمس غابت م البلاد
والحزن مسكه العناد ..
يفضل هنا
وقفت أفكر وأسرح واقول
إشمعنى موج البحور
بيرجع يحضن شطوطه
وأتمنى أكون زى رمل البحور
بس يجى يسمعنى صوته
كل حاجة هنا حكت على حبنا
وبرضه إشتكت من بعدنا
وأنا إشتكيت وكتير بكيت
وقلت لدموعى حرام
نفسى أنام ..
وانسى ألام السنة
يازمانى ليه الفرح راح
ولإمتى هنعيش ف الجراح
قول يازمانى مخبى إيه
قهر وأهات ..
وصبر مات ..
يازمانى هتخبى ليه
دا اللى مات فرحى أنا
وكل شئ كان مباح ..
أصبح منى
بعد ماضاع مننا ..
هنا من سنة

أعجبني