طب تعمل ايه ؟
**************
طب تعمل ايه ؟
لما تلقي الباب بيقفل يوم عليك ؟
لما تلقي الصبر يتسرسب من بين ايديك ؟
لما تلقي القهر ساكن يوم عينيك ؟
لما تلقي البسمة خاصمت طلتك
والعتمه سيل داخل عليك ؟
هيه دي كل الحكايه
رحله صعبه من البدايه
فيها ظلم وفيها قهر
وفيها عبره وفيها آيه
وحده سده الباب عليا
مانعه قلبي من الشكايه
ليه بنكتم جوه منا
صارخه طالعه من الحشايا ؟
هو يعني الضعف عيبه ؟
م احنا في الدنيا ضحايا
للمواجع والمدامع
والديابه والبلايا
ناس بتتمني السياده
وناس ماهيش طايله البقايا
وآهي طاحنه في الرحايا
لو ضروري أقولها تاني
هل هيتغير زماني ؟
هل هتشرق شمس غايبه
شايله جواها الأماني ؟
هل هتتغير حياتنا
وتبقي حلوة ولو ثواني ؟
هل هنصحي في يوم نلاقي
حقنا من كل جاني ؟
ولا كله كلام أغاني ؟
واحنا قسمتنا نعاني ؟
بقلم /إبراهيم فهمي المحامي
ليست هناك تعليقات:
إرسال تعليق