العشم
★★★★★★
وكالعادة...
كُتر العشم بيشغل التفكير
ولما الكسرة بتيجي م الكبير
يبقى العشم .. همّ
ووهم كبير
وسراب الصورة..
اللي تبات مكسورة
ليها كسرة نفس
وطفية آخر سراج
كان ح ينير
★★★★★★
وانا لما أسألك يا طير
ليه مهاجر
وتارك الاوطان
رايح وجاي
تدق بجناحك على البيبان
تدوّر على الضيّ
وتروي فؤادك الحيران
ما كنت تهدى
في قلب حبيبك
عشقك في قلبك
والليل والنجوم في جيبك
والصورة وبروازها
فوق الجدار أحضان
بدل ما تتعشِّم
ويتكسر خاطرك
على ضهر حجر صوان
★★★★★★
وسألتك يا طير
عن طول المسافة
لسة كتير ؟؟؟
ولا هانت الغربة
والسفر والتفكير
يا قلبك الصندوق
مليان بالمواويل
وناي وربابة
ووتر حزين وكسير
عمّال صوتك بيندب
على نغم السواقي
وولا عشمك كان في محله
ولا التور شرب م البير
.
.
لمياء حمدي
ليست هناك تعليقات:
إرسال تعليق