‘‘‘‘‘‘‘‘غنوة وطن‘‘‘‘‘‘
ليه الغنوة مكتومة وملهاش صوت
والضحكة مخنوقة ورايحة لموت
وكل اللي فاضل عندي حلم غريب
بيشق صخرك عشان للأمل يفوت
‘‘‘‘‘‘‘‘
وعشقك عمر عليه القلب متربي
فيه النبض ليه خايف ومتخبي
كأن الخوف ما فارق يوم دربي
وبكرة يعدي وكام بكرة بينا يفوت
‘‘‘‘‘‘‘
والغنوة فيكي تغريبة بعزف الناي
وأنا فيكي غريب ما أعرفش ازاي
تايه في دربك يوم رايح ويوم جاي
ومع كل توهة يشيب الأمل ويموت
‘‘‘‘‘‘‘‘
غريب في دربك وانتي اللي ندهاني
قربت منك خدتيني من ألم لألم تاني
والعمر سنينه عدت وانتي وخداني
لحلم يبدأ بالضحكة وينتهي بالموت
‘‘‘‘‘‘‘‘
ياغربتي وأنا عايش لسة جواكي
وكل سكة ف عمري بدايتها وياكي
ونهايتها سد مرسوم علي ايديكي
يأس يمشيني ف طريق الموت
‘‘‘‘‘‘‘
ياقسوة عيشينها وغربة ف وطن
ياصرخة لو خرجت الموت التمن
حتي في الموت صعب نلقي الكفن
ياحب وأجمل ما فيه ييجينا الموت
‘‘‘‘‘‘‘‘‘‘‘‘ أيمن بلال
ليست هناك تعليقات:
إرسال تعليق