مصر الخير
_________
تعالي ياقلم نكتب قصيده مسمعا
تقيله في معناها موزونه في نظمها
كل اللي يقراها يقول عليها الله
روووووعه ماكتب القلم وابدعا
***
تعالي ياقلم خد مني الكلام واكتب
اكتب عن المظلوم ازاي بدعوته يغلب
اكتب عن مصر الخير ليه يضيع خيرها
وشبابها ليه شاب قبل الاوان اكتب
***
اكتب عن الشارع البارع في عرض الجواري
اكتب عن الحواري اللي غرقانه ف مجاري
اكتب عن الفساد اللي فاق سواد الليل
اكتب عن النيل اللي فيه الوباء جاري
***
واسال ياقلم عن مصر واهلها الطيبين
وازاي كدا عايشين من ملايين السنين
يروح فرعون لعين يجي فرعون العن
الشعب فرعنهم ولا هما كدا مخلوقين !!!؟؟
***
وتعالي ياقلم نرسم بالحروف ابيات
لا انا فيلسوف ولا كنت يوم نحات
لكن في حب البلد ناسك ومترهبن
راجل ومتنسون ازاي يحكم علي شنبات
***
في غفلة من الزمن ركب الجمل وقاله شي
الجمل لانه جمل معرفش غير يمشي
شال فوق كتافه كتير واحتمل احمال
تقل الجبال دا لو جبل كان مايطقشي
***
ثارت الجمال في عهد جمال طردت البشاوات
ومع السادات عبرت في ست ساعات
وف عهد المبارك بركت الجمال كلها
تلاتين سنه باركه وفجأة هبت من ثبات
***
هبت رياح التغيير لازم يطير راس النظام
ح نغير كل شئ حتي النشيد والاعلام
ثورة شباب حماسية من غير سلاح ولادم
طالب كرامة وعداله وانه عيش بسلام
ليست هناك تعليقات:
إرسال تعليق