تمت إضافة 2 صورتين جديدتين من قبل Hesham El Dishnawy.
ساعة غروب
ــــــــــــــــــــــــــــــــ
غنى الحنين والإشتياق
وانا كنت لسة يا دوب
بارفع إيديا وأودعك
لما سفينة الفراق
فردت شراعها للرحيل
ساعة غروب
ــــــــــــــــــــــــــــــــــــــ
ولأنى عارف إن أنا
ماقدرش منى أنزعك
ودا شيئ أساسا مستحيل
فانا قولت أهرب وابتعد
يمكن يكون الحل كامن فى الهروب
يمكن يكون سفرى الطويل
وإلى الأبد دوا للقلوب
متحجرة فيا الدموع
لكنها بتئن جوايا قوى
وكأنها صورة حزينة
بتتوشم فوق الضلوع
ـــــــــــــــــــــــــــــــــــــــ
وشريط سيرتنا بيترسم
على ننى عينى اللى إختفت
منه المناظر كلها
وما عادش شايف سكته
ولا عادش شايف أمكنة
غير صورة ليكى إنما
بهتانة جدا
داكنة
ـــــــــــــــــــــــــــــــــــــــ
وودانى لسة بتفتكر
آخر كلام كان بيننا دار
إن الفراق أصبح قدر
وانه إتبنى بينا جدار
يعنى الرجوع لبعضنا
أو الخضوع لحبنا
ما عادش فكرة ممكنة
ولا بعد مليون إعتذار
ــــــــــــــــــــــــــــــــــــــ
وعشان كدا
وبرغم كل توسلاتك
ليا إنى إنتظر
ولأنى رافض لانتظار
جمعت كل الذكرايات
جوايا وأخدت القرار
ما أقبلش إنى أكون بديل
أنا الحياة وأنا النهار
وإنتى اللى عايزانى أموت
وانتى اللى عايزانى أبقى ليل
ملعون أبو الحب الذى
يخللى قلبى يبات ذليل
أو لحظة يشعر بانكسار
حياتى جنبك إنتحار
وحياتى بعدك موت بطئ
لكن بطعم الإنتصار
هشام الدشناوى
ليست هناك تعليقات:
إرسال تعليق