""" حكايه إلكترونيه """
بقلم:- أحمد عبدالباقي
--------------------
قعدت ع الفيس مره تشيت
وتكلم صاحبتها طبيعي
كالعاده ضحكتها العالية
رسم لها الجو ربيعي
وتملي بتقرأ بوستات
وتقلب جوه الصفحات
وحبايب قاعدين يتواعدو
شايفاهم في الكومنتات
والقلب بتاعها اللي محبش
في الحب أهو عايش حكايات
من غير مايكونله حبيب أصلا
بيعلي هو الدقات
بيدفي مشاعره البردانه
ويعوض نقصه في حاجات
علشان مايحسش بالوحدة
ويقضي أجمل أوقات
مستني يشوف قلب حنين
ويقرب منه الخطوات
والعقل ملخبط تفكيره
بتمني يعيش حب حقيقي
فيتوه هو في تأثيره
وتروح هي في سكات
وفي لحظة صمت عيشاها
اتفاجأت برساله ع الشات
من شاب بقول
عايز اتعرف
ردت وبسرعه أنا أتشرف
وسؤالها الأول كان ليه
أخبارك في الحب دا إيه
رد بسرعه أنا سينجل
ردت وقالتله إحنا سناجل
ولقيته أصلا يشبهها
فمشاعر بدأت تتبادل
وكلام الليل بينهم طال
وحاجات جواهم مش باينه
دلوقتي بدأت تتقال
السر مابينهم بقا عاده
والحب بقا هو الحال
وكيانها اتلخبط ع الآخر
ماهي دايما مشغوله البال
سكرانه في إحساس مجهول
جواها وسواس شغال
بتفكر دايما في الحاضر
وتخاف م الحب ليتصادر
وبتسمع همسه جواها
ياحبيبتي نكمل
مش قادر
فتعيش في الوحده
مع دموعها
وتموت م الجرح الغادر
--------------------
أحمد عبدالباقي
ليست هناك تعليقات:
إرسال تعليق