أنا والخال
.................................
في كل حلم بكلمه
والنهارده الوقت طال
وكل مره بسأله
هو إحنا ليه بميت الف حال ؟
رد عليا الخال وقال
إسمع يا ولدي ..............
الشعر مش قافيه وميزان
الشعر عقل
يموت علي إدين الجبان
الشعر فعلا موهبه
بس الهبه في الاتزان
في شعرا ياما أتعلموا علم الكلام
بس عيبهم
لو تعيبهم يستخسروا فيك السلام
يألف خساره لما الكدب
يسكن قلوب وِلْدْ إلعَلاَمْ
تلاقي الكدب فوق الحق
ملجمه بميت لجام
إنتم ياولدي عصركم عصر الفتن
والعدل تايه في القلوب
مش لاقي مطرح أو سكن
عايز تفوت من غير سكوت
خليك جمل
أصبر علي الجوع والعطش
ولو حاولوا مره يوصفوك إنك بطل
حاسب ياولدي السم ديما
راح يدسوه في العسل
إنت يابني من الغلابه
والغلابه ناس كتير
عيبهم قلوبهم طيبه
والطيبه فيهم عيب كبير
بنص كلمه حنينه
الظلم يوهم بخير
إكتب حروفك للزمن
يا خال وأيه بس التمن ؟
التمن ديما بيجي يا ولدي
من جنس العمل ..........
أنا كنت زيك تايه في زحمة
الوطن ......................
جيت م الصعيد علي مصر
بلا مأوى وسكن .............
والنهارده بكلمك وأنا أسمي
خال ...........
الناس علي كتوفهم شالوني
وحالي عال ........................
سيبك بلا إستهتار عيال ........
طيب يا خال ....................
ممكن سؤال .....................
إسألني راح أجاوب عليك
إسأل وقول أيه إللي بيك
بكرا وعد مني أجيك
أصحى شغلك بيناديك
وإنت ماشي في الطريق
أي حد في سكتك سلم عليه
......................................
عصام دويدار
ليست هناك تعليقات:
إرسال تعليق