** مذكرات مخطوف **
يالّي نويت تخطف طيارة
و النبي قولي بلاش تنساني
لما تروح ابعتلي إشارة
علشان أجي معاك يا أناني
عدي البحر الأبيض بينا
قبرص روما و لا باريس
عند أوروبا قوام ودينا
هنعيش عيشة تمام و نهيص
يلا يا شاطر من غير خوف
خلّي الكابتن ينزل بينا
يلا قوام خلينا نشوف
أرض أوروبا الغالية علينا
سارح ليه و عمال بتعيط
إوعى تكون راجع في كلامك
بكرا تكون مشهور متسيط
و الكاميرات ألافات قدامك
أتاريك عاشق جاي تقابل
حب قديم و واخدنا معاك
أملي و خاب و انا فاكرك راجل
و ياريتها جات تستناك
لافف حوالين وسطك لفة
شاش على قطن ومش ديناميت
يخرب بيت كداب الزفة
فرجت علينا المخاويت
إرجع بينا يا كابتن تاني
فرحة ما تمت و لا شفناش
وش إيطالي و لا ألماني
واهي خطفة وعدّت ببلاش
** محمود بيومي **
ليست هناك تعليقات:
إرسال تعليق