بَقِيِتْ خريف / عاميه
,,,,,,,,,,,,,,,,,,,,,,,,,,,,,,
عيد ميلاد ايه بس جانى ؟
هو انا عشت اللى فات ؟
كل أفراحى ثوانى
عيشتها ف الذكريات
فين طفولة ما عشتْهاشْ ؟
فين شباب أصلاً ما جاش ؟
الربيع عدّى وسابنى
ماشى وحدى ف ليل طويل
واللى قلبى فاكره جنبى
لحظة فات لى المستحيل
لو فتحت الذكريــــــــات
كل أوراقى حزينة
كل حرف بيحكى لحظة
من ليالى هموم دفينة
حب ضاع من غير وداعْ
مركبة من غير شراعْ
ولمّا موج البحر يعصف
ببقى وحدى ف الصراع
حتى أغلى الناس فاتونى
وِسْطْ حيرتى
وف ظنونى
شوفت ظلم وغدر ياما
شوفت جوّه الناس دمامة
شرّدونى
وفرَّقونى
حرّموا تزورنى إبتسامة
ليه هفكّر ف اللى فات ؟
هو أنا نسيت الآهآت ؟
لسّه جرحى جوّه منّى
فيه سيناريو الذكريات
ايه هقول واشرح كمان ؟
وليه هجيب سيرة اللى خان ؟
وايه هينفع لو حكيت
الظلم من أول م بان ؟
شئ فظيع إنك تلاقى الغدر من أقرب قريبْ
شئ فظيع إنك بتحضن بلوتك متْقولش عيبْ
إنتوا ليه بتفكرونى بعمر عيشته مش سعيد ؟
ايه هيفرق لو هتيجى لحظة تانيه وعام جديد ؟
هو عيب ف وشوش خانتنى ؟
ولاّ أنا عايش طريد ؟
برّه نفسى
وبرّه ذاتى
برّه إحساسى بحياتى
برّه أسئلتى اللى ياما
سهّرت عقلى ليلاتى
والنهايه ....
بَقِيتْ خريف
جوّه منّى شيب مخيف
حِلم متكسّر وعاجز
والشراع أصبح ضعيف
فى النهايه
كأنّى ضيف ،،،،،،،
بقلم / إبراهيم فهمى المحامى
7/3/2016
ليست هناك تعليقات:
إرسال تعليق