مافيا المرتشين
سعادة البيه المدير
أهلا وسهلا يا أمير
شرفتنا ونورتنا
وانزاح الكرب عننا
عندى ليك حبة نفاق
هيخلو صحيح عقلك يطير
من يوم سعادتك مجيتلنا
والله دا كان يوم سعدنا
غار اللى كان قبلك هنا
وارتاحنا من وشه الفقير
كان قارفنا ومعذبنا
وف رزقنا بيحاربنا
والسلك كان دايما ضاربنا
ويوماتى بيصحى الضمير
نقول شمال يقول يمين
كنا بصراحه محتارين
نسانا معاه أكل السمين
خططنا وفحتناله بير
كنت فين من زمان
اشتاقنا خالص للحنان
هتكون معانا فى الأمان
مدام على الدرب تسير
لما تهاودنا هنظبطك
وعلى الفلوس هنعرفك
ومحدش ابدا يكشفك
وتنام تشخر ع الحرير
انشاله تكون رسالتنا وصلت
وعلى الله تكون اتفهمت
هتدايقنا مش هتفلت
هنعينك فى جهنم سفير
أهلا بيك سعادة المدير
ليست هناك تعليقات:
إرسال تعليق