قصيدة ( علمونا زمان )
# مفتتح #
أعمى ومش شايف
واقدامى وخدانى
عايش أنا مسجون
وسجني جوانى
والعلم لو للعلم أكيد هيتقدر
بس المصيبه
بيعلمونا شيء والصح شيء تانى
...........................................
كانوا زمان بيعلمونا
إن بلدنا دى آبيه
وان العدى بتلف ارض الله تجور
لكن النهايه لكل جبار فيها هي
طب أيه اللي حصل يا بلادي
بتسيبي زهر العمر يدبل فوق رمالك
وال جالك جالك
واسألي حتى رمالك
يمكن تعرفي ساعتها
لحد فين وصل حالك
....................................................
رمل سينا مش رمل عادى
رمل متلون بلون دم الجنود
وال ياما ضحوا عشان يحافظوا ع الحدود
وال شال كفنه فى أيده وروحه قدم
لجل ما يحمى ترابك
بس رد فعلك يا بلادي شيء مخيف
حتى إحساسك بحزنك كان سخيف
والملامح هي هي كأنوا عادى
وال يضحك يا بلادي
انك تسيبي إل يسوقك
عاجز كفيف
....................................
علمونا زمان إن الحره
لو وسط ميت ألف راجل تفضل حره
وإنها بتصون الشرف والعرض
وجدرها مادد لسابع ارض
علمونا انه فى عز الفقر والحوجه
بتتغطى بشرفها فيكفيها عذاب البرد
دلوقتى علشان كلمه جريئه
تنسحب من حضن أبوها ف نص الليل
تتمر مط عذاب وويل وتتسحل فى الأرض
فمتزعليش لما يتكره اسمك
ومتزعليش لما تلاقى أولادك
هجين على بره
....................................................
علمونا زمان إن المحبه بتخلق روح وفكر
وان النقاش والاختلاف حاجه صحيه
النهارده المحبه أصبحت مذله وقهر
والنقاش بقى سيئ النيه
مبقاش فيكى يا بلد
حد قادر يتحمل آسيه
مبقاش فيكى غير شوية رقاصين
مفضلش فيكى غير الصجات
والكدابين والغشاشين
وال يتكلم فيلحد وال قابض لجل يمجد
وال مظلوم فيعند
مفضلش فيكى يا بلد غير النفاق
دنيا ودين................ ( المقصود الاختلاف السياسي كلا على فكره )
.....................................................................................
علمونا زمان إن فجرك لسه جاى
وان الايد ويا الايد بتبني وتعمر
دلوقتى ايديكى مقطعين
نص صوابعك فى السجون
ونصهم خايفين
متكبره تحسى ولادك
متكبره تحنى فبتزيدى بعادك
متكبره تقولى الحقيقه
فبتسيبيهم محتارين
...........................................
معلش يا بلادي وآسف
لو كلامي كان سخيف
دمعي أتهرى من كتر البكا
والبدن أصبح نحيف
وال يقبل بالمذله
يقضى طول عمره ضعيف
معلش يا بلادى وسامحي
ما أنت طول عمرك مسامحه
ورغم كونك مهره وعفيه الا انك
قابله يكون خيالك
عاجز كفيف
# الطيب عوض احمد
ليست هناك تعليقات:
إرسال تعليق