آآآآآآآآآآآآآآآآه يا زمان
**************
**************
يا فرع توت
مايل يضلَّل ع الجسور
شاهد على كل العصور
على شط ترعة كفرنا
و القُلَّه فى حضن الكفور
و الجرن بور
كان فى صبانا يُضُمِّنَا
نلعب سوا
نضحك سوا
كان فيه أمان
لو فيه زعل
لوفيه خصام
نختلف و نروق قوام
أصل دى دايمًا عادتنا
و طبعنا
يا فرع توت
اغضب و ثور
احكى عن الحب اللى كان
بينا زمان
احكى على صوت السواقى
و الأدان
آآآآآآآآآآآه يا زمان
كان اللى كان
الناى على جزع النخيل
ساعة عصارى مِنَسِّمَه
و الزرع للفلاح يميل
و السنبله
تحضن اديه متبسِّمه
و الشمس فى ساعة غروب
عايزه يا دوب
الليل ف لحظه قوام يدوب
صعبان عليها ساعات تفارق حضننا
عايزه تعيش هنا و سطنا
دا كان زمان
إيه يا ترى ؟؟
في إيه جرى ؟؟
خلَّى الزمان غير الزمان
الضحكه ليه فوق الشفايف
دَمَّعِتْ ؟؟
مِتْنَكِّدَه؟؟
مستغربه ؟؟
مِتحيَّره؟؟
و الفرح ليه م الكل خايف ؟؟
و الهم فوق الروس جدايل
فَرَّعت
مِتدَفَّرَه
و الحزن كاس مليان وداير
بين الجميع
شيخ أو رضيع
شهم و وضيع
يا آآآآآآآآآآآآآآآآه و شارخه الحنجره
الخطوه ليه ترجع بنا أميال ورى؟؟
بينا و بين النور بحور
كاااااااااااام ألف سور
ا فرع توت
مايل يضلَّل ع الجسور
شاهد على كل العصور
اغضب و ثور
احكى عن الحب اللى كان
بينا زمان
احكى على صوت السواقى
و الأدان
آآآآآآآآآآآه يا زمان
كان اللى كان
************
أحمد السباعى
ليست هناك تعليقات:
إرسال تعليق