(بكام الدنيا )
يا عمي كمال
سألته سؤال
بص عليه
معاجبه الحال
كل ما يمشي
يلاقي موال
يحكي في روحه
في الصحيان
ولما ينام
ينام عيان
جاب الطرحة
والفستان
لكن مراته
ما يعجبها الحال
ماسكه لجام
وراكبه أتان
عايزه غوايش
والخلخال
طب للجواهرجي
نقوله بكام
واللي هايدفع
يكون مليان
يا اللي مراتك
عامله دلال
طالعه بتسرح
ملهاش مطرح
شوف الحكاية
وين المسرح
واللي ها يسأل
يكون ثعبان
قولي يا عمي
الدنيا بكام
***
فاكر إن الدنيا أمان
فيها العقرب
والعدمان
واللي بياكل
من غير أسنان
واللي خايف
من الددبان
واللي بينهش
في الأيتام
واللي موحش
من الأدغال
شبه الغول
ليه قرون
وأنت يا روحي
ماشي سئمان
ومكتف نفسك
بين جدران
قولي يا عم
الدنيا بكام
***
كيف أحكيلك
وأنت بعيد
ساكن العالي
جو البيد
شفت أمبارح
أولاد عيد
جابوا عربية
بتقول بيب
واللي راكبها
بيشرب بيب
كان بشواله
ليه رواله
راكب حمارة
فيها شبرين
إياك تسأل
وتقول من فين ؟
قولي ياعمي
الدنيا بكام
***
أنت مهبل
ولا عبيط
عايز تلخبط
في اللخابيط
ولا تلطلط
في اللطاليط
رزق وجاهم
من السموات
جابوا شمهورش
في أسرع وقت
جابوا عربية
وفتحوا تكية
وجو البيت
زرعوا الورد
وجو الجامع
طال الوِرد
مسكوا مسابح
يعموا عيون
كل الخلق
قولي يا عمي
الدنيا بكام
بقلمي :
الشاعر //سيد يوسف مرسي
ليست هناك تعليقات:
إرسال تعليق