تعظيم سلام
تعظيم سلام للى اتجبر
يطوى ضلوعه على المذله وصبر
تعظيم سلام للى انتظر ياخد اشاره وعبر
تعظيم سلام لبطل همام عرف الكرامه و قدرته
وكيف يحمى الوطن ولمين يوجه طلقته
تعظيم سلام للى بكت يوم الشهاده حتته
تعظيم سلام للى انجرح وكل الوطن كان اسرته
تعظيم سلام يا ابن البلد يا ابو العزيمه والجلد
ساحت المعارك اشتكت والنجم فى السماء شهد
تعظيم سلام للى شهيد واللى رجع
تعظيم سلام للى اتفقد
تعظيم سلام لسلاح سله على العدو
وحناه فى وجه ابن البلد
تعظيم سلام لك يا ولد
ياللى حافظة العهود والشعب عليك اتسند
تعظيم سلام لابن الكرام اللى مقلش فى يوم كام
سعر الكرامه وعزته غير انه يلبس شدته
تعظيم سلام لدم عام على رمل سينا وصخرها
تعظيم سلام للى دفاه كان بردها
تعظيم سلام للى حضن فيها حرها
تعظيم سلام لك يا علم لما اترفع فى تلها
تعظيم سلام للى طواها وردها
تعظيم سلام لكل حبه فى رملها
تعظيم سلام لكل صخره فى صخرها
تعظيم سلام لكل عود وكل شجره فى ارضها
تعظيم سلام للى اتجبر
يطوى ضلوعه على المذله وصبر
تعظيم سلام للى انتظر
ياخد اشاره وعبر
منغير كلام تعظيم سلام
لجندى قام من عز نومه وسهر
يحفظ كرامتك يا وطن
تعظيم سلام لك يا سليمان
ياللى بعزيمه وبأيمان وهبت روحك للوطن
ورد الجميل حبل فى سجن واتعدم
تعظيم سلام للى القلم مكتبش اسمه واتظلم
تعظيم سلام لقبر معلهش بيان
مكتوب عليه هنا بيرقد اللى كان
تعظيم سلام لك يا وطن
بقلم محمد البلاط
ليست هناك تعليقات:
إرسال تعليق