........
الكل فاكر دا طفل ميت والسلام
فوقوا ياعرب داضميركم بالتمام
ده الرجوله والشهامه والأخوه
دُوُل اللي ماتوا ومات الإعتصام
ملعونه كراسيكم عار على نواصيكم
كبرتوا الكروش في حب العروش
وحلق وحوش ماترحموش وبلاد تذل فيكم
متحكمه فيكم متسلطين عليكم
وإنتوا اللي طالع عليكم رعاف الكلام
راضين بالخزى والاهانه ليه.؟
إيه بس اللى يصحيكم من نومكم إيه
حكام لئام أحزاب خراب حزمةديابه
ضاحكه عليكم ساحره لعيونكم وبتغميكم
سجون ومعتقلات وفرد في العضلات
وإعلام الصدقات شالل لأفكاركم
فوقوا بقى إمتى هتصحوا من الأوهام
فين العروبه فى دمكم فين من زمان
طب شرع رب السما اللي فى القرآن
فين الإنسانيه في التعاطف والاخاء
مبسوطين وقانعين بعيشة التوهان
والله أنتم في نكسه وحالة إنفصام
مسلمين بورما مابين قتل وحرق
والأقصى شاكيه لربها بصوت البرق
وأنتم ولا أنتم هنا أنتم متفرقين متمسكنين
ساكنين الكهوف وصوتكم لساه في الشق
يعنى عيشتكم وحياتكم أساسها حرام
ده طفل من ملايين العرب اللي ماتوا
والشعوب إتزمردت عليكم و عاتوا
قتلوا شيوخكم ونسائكم إستباحوا
ويطلع سفرائكم يشجبوا وينددوا
مات الضمير الله يرحم مقامه
وياريت حكامكم من الميلة إستقاموا
مش مهم عندهم أي دم يستباح مش مهم
وسؤالي ليهم كلهم إمتى من النومه قاموا
يآه مافيش ولاشىء نافع ولا حتى الكلام
بس ده من غلبناوقهرنا بنكلم الأموات
ولا نافع اللي جاى ولاعبره في اللي فات
وأهو كلمتين أو صرختين م الصرخات
والخلاصه العرب مش باين لهم تانى قيام
.
بقلم \صلاح الصغير
ليست هناك تعليقات:
إرسال تعليق