الشاعرة/إيمان سامح
والشاعر /علاء الدين علي
(((( إحساس . مخيف ))))
*علاء*
على سهوة بدون إنذار
تطير ع النسمة أمنيه
متوصفتش فالأشعار
ولا ألحان لأغنية
دا لون البدر ف عيونك
ونبضك دق صحاني
ولون السعد من لونك
صعب جدا تبكي تاني
*إيمان *
السعاده كتيرة فعلا
ماليه من حواليا دنيا
بس لسه بشوفها دمعة
بخلها أكبر قضيه
نفسي امد ايدى اكبش
منها مغرفتين تلاتة
نفسي حتى منها احوش
حتى لو كان بالتباته
*علاء*
البخيلة بين إيديكي
إغرفي منها إشتياق
جهزي ليها عنيكي
وإلمحي حالي ف فراق
*إيمان*
حالك إنت زى حالى
احنا اﻻتنين غلبانين
طوحتنا الدنيا ياما
غرقتنا ف اﻻنين
السعاده قصادى بابها
بس ليه قفل وكبير
قالوا لجل اخطى عتبة
الحساب هايكون عسير
*علاء*
إضحكي تداويكي دمعة
رغم قسوة ملحها
تلقي نبضه بيها طالعة
تسعدك من بعدها
*إيمان*
الابتسامة كتير بتيجي
والعنين قافله الرموش
زى دميه ف قلب ملهى
بنداريها بالرتوش
دى السعاده بضاعه غاليه
والتمن غالى كتير
خايفه ليها اكون ضحيه
واﻻلم بيكون مرير
*علاء*
الرتوش رمز لجمالك
قلبك النابض عطف
عند بابي عجبني حالك
اللي عمره ما إتوصف
ليست هناك تعليقات:
إرسال تعليق