((حـِوار مع ا لقَرين)) تعريف الشاعر/ يحيي المصرى

((حـِوار مع لقَرين))

1 ـ ألقَرين 

فاكر إنـِّى ف لحظه هاسيبك ...

سَهم الدُنيا ياواد هايصيبك ...

دانتَ حبيبى وفـِكرى حبيبك...

................................

رَكـِّز واسمع وافهم منـِّـى ...

لاجل مااعينك وانت تعينـِّى ...

................................

أصل انا عارف إى اللى ف نـِفسَك ...

عاهـِد وابقَى خـَدَّام نـَفسَك ...

..............................

وهالَبـِّى لك كده رَغَباتك ...

إسمَع منـِّى وعـِيد حساباتك ...

بَدَل الوحده بقـِلـِّة حيله ...

هصطاد لك كده أحلى خليله ...

خـُد من نـِفسَك كده كام ليله ...

وامـَّا هاتزهق تلقى بَديله ...

.............................

ليه العيشه مع الحرمان ...

ليه الفقر مع الأحزان ...

ماشى معاك وف كـُل مكان ...

كـِـيف بالمبدأ تلقى حنان ...

ولا هتلاقى ف بحر الدنيا ...

حتِّى سلام ولامرّه أمان ...

..............................

عاهِد وابقى حـَدَّام نفسك ...

وهالبِّى لك إللى ف نـِفسَك ...

بـَس بشَرط هتبقى معايا ...

خطوه بخَطوه وتمشى ورايا ...

أبقى كظلّك كده كمرايا...

...........................

بيع واتنازل ياللا ياصاحبى ...

واسأل كام مليون من صاحبى ...

شافو العـِزّ ف وسط مـَراحبى ...

غـَشـُّوا وسرقوا ورِكبوا مَراكبى ...

ولا فيه سائل ولامسئول...

واللى يفَكَّر مرَّه ويسأل ...

يلقى عيون اللى اسمه الغول ...

............................

وانا هتعاهد كده ويَّاك ...

لحظه بلحظه وهابقى معاك ...

فى الخَمَّاره وهاستنّاك ...

وسط الجـِنس وهابقى وراك ...

أمـَّا الكِبر انا هابقى فدَاك ...

........................

واحسد كده على قَدّ ماتحسد ...

واجمع مال من الرشوه وعَدِّد...

بس الشرط الشَرط ياصاحبى ...

كده نتعاهد وهنتواعِد ...

تبقى مرايتى وأبقى مرايتك ...

أصل انا عارف إى اللى ف نـِفسك ...

وهاكون خـَدَّام أيوه لنَفسك ...

وانا متعاهِد عـُمرى مااسيبك ...

تبقى حبيبى وابقى حبيبك ...

أمـَّا السَهم لابُد يصيبك ...

أمـَّا السَهم لابُد يصيبك...

...............................

2 ـ العَبد

قبل انا مابدأ سطر كلامى ...

لازم تفهَم إنّ مقامــــــــى ...

مقرون كده من جنس علامى ...

أصل أُصول العِلم ياجاحِد ...

من بُرهان اسمه القُرآن ...

كـُلّ كلامُه وكُل حروفُه ...

جاى من ربّ اسمه الرَحمن ...

متبَلّغ عن سيدنا مـُحَمَّد ...

حقّ رسول اسمه العَدنان ...

وانت يالَعنه ف دُنيا وآخره ...

بُكره هاشوفَك فى النيران ...

أمـَّا دَهائك ويـَّا ذكائك ...

كده على مـَرّ من الأزمان ...

عـُمره ماحَرَّك شَعره ف راسى ...

ولا هيهـِزّ الظـِفر كمان ...؟

رُوح واتمَطَّـَّع جـَنـِّد واحسِب ...

قـَدّ ماتقدر من الإنسان ...

وانشُر شـَرّك قـَدّ ماتقدر ...

وسط الدنيا ف كل مكان ...

إنشر قتل وغـِش وسرقه ...

وما تنساش الفُرقه كمان ...

لكن يااهبَل ياابن الأهبل ...

لينا رسول اسمه العَدنان ...

جاى من ربّ اسمه الرَحمن ...

عارف معنى الجُمله ياجاحِد ...

ياللى بتلعب بالصِبيان ...

يعنى تواصُل بينّا وبينه ...

بالعُبوديه وبالقُرآن ...

هـُوّ أُصول العـِلم ياجاحِد ...

ياهاموش تابع للشَيطان ...

.........................

تعريف الشاعر/ يحيي المصرى