((كتف الحلم ))
لسه الكورة بتلعب بينا
شمس العمر بتحرق فينا
شوط ف قلوبنا
زود نار النور الواضح
تحرق فينا
دمع الجرح الصامد
رافض الشرخ ف عين حسادك
راسم صورتك شبه مناره
للي شافوها
لكن اصلك قمري الضاحك
رغم ضلامه نشوف النور
لحظه نوم الشمس ف حضنك
لكن نفسك وسط اطار
والهوى مقفول
مهما هقول
عمر الحلم ما خطى النايم
عمر الهوي ما يفطر صايم
رسم طريق الحق ب برجل
حالي اتبرجل
كنت فاكرني امير مقدام
فجأة لقيتني بقيت خدام
كف الحضن م يحضنيش
يهديني مر م يرونيش
ونيل الحزن يرويني
نسيتي طريقي حسيني
كاس الحنين منك طعمين
طعم طيب وطعم شين
طعم بيولد فجر الفرح
وطعم بيوجع خد الجرح
ليلك زي نهارك
شمسك جوا هلالك
وهلالك مش معدول
مهما هقول
كتف الحلم مهوش متحمل
ليه شياطينك جايه تحمل
هو جبينك بقي كام صفحه
نفسي ف وشك الاقي مصافحة
لسه بعوم ف الهوى جواكي
شايف ارضك زي سماكي
واكل منك زرع كلام
شارب منك طعم ضلام
حتى الضل مشفتوش جمبي
اطلب نور الحضن تخبي
كرباج القلب ب يوجعني
ليه جايه ب تشكي الاعذار
تهديني العلقم بيسرسب
وتزيدي عليه الصبار
يا قاموسي وحاره الفكر
عشانك جايب طبله وطار
والدمع بيدبح فيا ل زار
وتلف الساقية تدوخ واحتار
وانا لسه بعوم
ف الدمعه الفرحانه
لو ندت سحب الاحزان
والقلب العاشق عطر ترابك
نفسوا سجين
ف ضلوع حرمان
لا يشوف العطر ولا يدوقه
ف هواكي لسه الطير حلمان
جناحه طين والريش احزان
وقلبك زهره العباد
بيرفض ليه يشوف وشي
انا شمسك وانا قمرك وانا نجمك
وانا الضلمه علي غيرك وبرضوا النور
وانا زرعك ف حضن البور
وانا سكوت الالم مدفون
وانا العاشق وانا المجنون
وانا اللي وشي من طينك
وحضنك للي كرهينك
كفايه فرحتي اسودت
شفايف بكره اهي اتسدت
ب100غورزه
وسكين الضلام غارزه
ف شط النيل
و ايدك موج ف بحر الشوق
و نور الشمس لخد الرمش
يطبطب لما البرد يعدي
و يزرع فيا النور لعيوني
يفرح نن العين ف يندي
يروي خدود الحزن
يصبح علي انفاسي
يشبع بطن الشوق جوايا
واكسب مره حنين الواقع
لو هخشر كل معارك احلامي
ما انا دايما بكسبها وخسران
طول عمري اتالم
م اتعلم من جوف الطين
وطمي الحنين
شارب عرق صبري
وعيون الفرح
يرويها عصير روحك
حدفت العين ف احضانك
رجعت تتشعبط ف الرموش
قالت عنيها م بيشفوش
عريان الغرام ف الطل
وحضنك م بيهموش
زرعت الود بيفرع ولاد
يا ام العباد ندمان
وغلطان اللي باع العمر
من غير ما ياخد وصل
طول عمري عيوني تنام
علي حجر الريح
وتضفر كل نسيم الروح
ف ضفيره بلون الدم
بتنزف تروي الشوق
واللحم بيطرد ضافر منه
عشان العزم ف قلبه ضعيف
وكتاب الحلم صبح تخاريف
وربيع العمر زهور ف خريف
وريق الغرام ناشف
ب يتمني الحنان
حلبت بقره الوهم
شربت لبنها غباوه
نتفت الريش م القلب الطاير
حرم يطير ف الوهم
فنجلت عين الحلم ف نومي
وأخر حيطة عمري اتهدت
وانا جوا جراب الحظ
بيني وبينك دايما عازل
يشنق فرحه بكره
حاكم علي شمسك بالإعدام
وانا عيني ف عقب الحلم
فرشت روحي ف الضلام
ونمت حتي الحلم نام
كل اللي قام حبه كلام
متحشرين جوا الحلوق
ازاي نحس ازاي نفوق
والمخ جوا الطين
سرقوا كل الكلام
سابوا اللسان صامت
قبل ما اروح ع القبر بتاعي
ليا رجاء
لملم لحمي وحطه معايا
وقولها شجر الطين هيفرع
ليست هناك تعليقات:
إرسال تعليق