بحور الوفا عيونك
من ديواني حفنة غزل
-----------------------------
ياليل يلي بعينها سهران
ياريتني مثلك انا
ما كنت بعرف شو الضنا
بقضِّي حياتي بالهنا
وماكان عاش القلب بالاحزان
تمنّيت ببحور الوفا سافر
بلكي شي سفره تجُبر الخاطر
والموج فوق الشط يرميني
واصرخ دخيلك هون خلّيني
مدَهْدَك انا يا حلوتي وعطشان
لا تلومني ياليل عالغيره
صارت احلامي قدّك كبيره
وبتختفي مثلك بضي نهار
وما بعود بعرف شو جرى وشو صار
يمكن نصيبي ويمكن الاقدار
كتْبِتْ اليي عيش العمر حيران
ياليل يلي بعينها سهران
--------------------------
بقلمي راضي مشيلح
ليست هناك تعليقات:
إرسال تعليق