و ليه كفاية ..؟
وذكرياتك فى قلبى من البداية
وكل لحظة عشناها سوا..
ليها اكتر من حكاية
.فاكرة الجناين والسواقى ؟
ولا حنينى واشتياقى ؟
وكلام كتير ..انا لسة فاكر
وردة بنبض الكتاب ..لما اذاكر
ولا القصايد ولا المشاعر
....ومهما قلت...مش كفاية
طب فاكرة رعشة قلبي
يوم ما اشوفك معرفش اداري
ومن عيونك معرفش أخبي
طب فاكرة حبي
يوم ما اقولها
عيونك تزوغ وراح تستخبي
انا برضه فاكر أمصتك وسط البنات
لما اعدي ....
وتضحكلي واحدة راحت ولا جات
والغيرة تنطق من خدودك والسكات
ولما اسألك تكابري وتنكري
وتروحي تبكي بالساعات
وانا ما يخلصنيش من البداية
اطبطب واحايل
وأمسح الدمع اللي سايل
وكأنه جرح جوا نبضي
ومرة ازعل واسوي الهوايل
وياكش بحناني ترضي
بس الحقيقة كنت بفرح
مكنتش اقصد اهينك او كنت بجرح
بس كنتي بتعذريني
ولما اكلمك ...
تقولي سامحتك يا ضي عيني
ساعتها كنت بحضن وردتك
واقعد ابوس الرسايل
ومنديل مسحت فيه دمعتك
يصبر الروح والقلب اللي مايل
ودي البداية ومش كفاية
وربنا ما يفرق قلوبنا..
حتي لو بعد الممات
خالد العطار
ليست هناك تعليقات:
إرسال تعليق