حضرة مولانه
ـــــــــــــــــــــــــــــــــــــ
مخنوق
علي قد الشوق
ما ملكش غير إني
أبص لفووووووق
وأقول يارب
قلبي المسكين
ينبض آهات
وروحي هايمة
في عز النهار
كل اللي فاضل
حبة أنفاس
واللي عايش منا
لازم ياخد ع الراس
لازم يطاطي
لحد واطي
عشان يعيش
لابد يكدب ويكدب
قد ما يقدر
ما تسألونيش
عن طيبة ماتت من سنين
عن خداع لازم أعيشه
والبس في اليوم ميت وش
لازم أغش
وتكون الضحكة بهتانه
أملا المناديل بدموع تماسيح
علي كلب وغار كنت بقوله يامولانه
أشاور له في عزه مايعبرنيش
دلوقتي غار وحايجي بداله
مولانه جديد
ونفس الحدوته حانعيد ونزيد
والجرح حايفضل جوانا
سنين وسنين والبركة
في حضرة مولانه
ـــــــــــــــــــــــــــــــــــــــــــــــــــــــــــــــــــــــــــــــــــــــــــــ
بقلمي / محمود مسعود (( عامي ))13/3/2016م
ليست هناك تعليقات:
إرسال تعليق