زمان والنفس راضيه
فى جيب جلبيتى
علبة كبريت بس فاضيه
بلم فيها عيديتى
مليم من خالتى ناديه
واتنين من جوز عمتى
ولسه كمان راح آخد
من جدى وجدتى
لو كملت البريزه
هتكمل فرحتى
واروح أعينها مع أمى
تحافظ على ثروتى
واكتب كل طلباتى
وأحسب حسبتى
واعمل كل اللى فنفسى
أنا وعيال حتتى
هجيبلى كيس أرواح
واتنين كيلو تفاح
وهركب المراجيح
واقف فى وش الريح
ويمكن اخش السيما
أشوف فيلم العزيمة
ومقولش لوالدتى
وهشتريلى كوره
واتصور معاها صوره
اعلقها فى حجرتى
واشترى قلم رصاص
وخمسة وتلاتين كراس
واعينهم فى شنطتى
وهخلى منهم نصهم
يساعدونى فى زنقتى
دلوقتى العلبه فاضيه
ومش لاقى عيديتى
منير خاطر
ليست هناك تعليقات:
إرسال تعليق