.......غنوة حنين........
من قلب الألم بتتولد بالأمل حياه
رغم الصعاب شئ بيرجعنا للحياه
ضحكة طفل صغير نظرة لقمر منور
لمة صحاب فيها ضحكة م الزمن اللي تاه
..........
واهي أيام وبتعدي قدام عيوننا
لو فيها حزن بيعدي ومعاه همومنا
ونعرف ناس وينسونا عشان غيرنا
وحاجات تضيع وحب تاني بنلقاه
..........
ومن أيام لأيام بتاخدنا سنين العمر
وأيام بتجري وأيام نحس انها دهر
عمر وبيعدي بحبة فرح وحبة صبر
وأنا وأيامي جوانا حلم زمان عشناه
...........
ونبدر فرحة تطرح سنابل دمع بياخدنا
لسنين الصبر ساكن فيها جوا قلوبنا
ودمعة مش عايزة ترحل ولا تفوتنا
وتعدي وتبقي ذكري ف زمن مننا تاه
.........
وف عز الجرح وعز الفرح أنا عاشقك
بريشة بسمة بلون الضحكة أنا رسمك
بقلب يساع الكون حب كان حبك
صورة حلوة بتغني وتغير فينا الحياه
.. ......
ياضلة لقلب نار الحيرة بتلعب بيه
يابسمة ف عز الكرب تطبطب عليه
يايوم بيهل يشق الحزن ونفرح فيه
ياحلم لو تاه عمري جوا حلمك بألقاه
...... أيمن بلال
ليست هناك تعليقات:
إرسال تعليق