ولد سيدي يحي
انا ولد سيدي يجي بن منصور
بالشجاعة مشهور
ف صغري كنت كنطير مع الطيور
عشت ف الويدان وسكنت ف القبور
حصدت ب المنجل وحرث ع الثور
خدمت ف الطوبيس شيفور
طيحت الغابة ب الشاقور
تزوجت من زمور وازمور
اليوم كبرت خانتني الصحة عيا الموطور
وليت بين الزناقي ندور
عايش بين الناس محكور
ف الدنيا مجرور
مشيت عند لفقيه يمكن انا مسحور
اعطاني حجاب نمحيه ف الماء
نشربو قبل لفطور
مانفع معايا لا لاحجاب لا بخور
بعت الدار وبعت الديكور
مالقيت باش نعيش
حتى حاجة ما بقات فابور
كانت لفلوس كان كلامي عسل
اليوم رجع حرور
ضيعت مستقبلي ضيعت الدرهم
عايش ف لحزان والغم
شاد راسي ف الارض نخمم
ما نفعني لا ولاد لا خال لا عم
مرضت ب فقر الدم
ياربي شوف من حالي ورحم
عايش غريب شكون معايا يتكلم
الرجال ف هاد الزمان قلال
بنادم عباد المال
حمقوني ب القيل والقال
صابني الشلل يا خويا علال
قالوا ناس زمان ربعة ف الدنيا هبال
1 لي اتجه القبلة وبال
2 لي مشى السوق بلا مال
3 لي نزل البير بلا حبال
4 لي دار المرا راس المال
الله ينجيكم من هم الدنيا
ونا نصبر المكتوب راني عايش مع هاد الحال
شحال من حنش مات من سم الدفال
راني تايه ف الدنيا ومرضيت نسال
لي قال المرشح صادق ف كلامو محال
سنين حنا عايشين على نفس الموال
شحال وشحال صوتنا على الناس العقال
هما نهبوا المال حنا ركبنا لهبال........................................................
زجال الغرب
حسن البرارحي
سيدي يحي الغرب
ليست هناك تعليقات:
إرسال تعليق