حَـبـهـان.com
تعرف تعد لحد كام ؟
ولا كل أعداد الحياه
هاتعد قولى وحكمتى
ولا حتى حرف ف كلمتى
ولا كلمه واحده ف نظرتى
أنا أيوا أه أوقات بااجوع
والشِعر هو الزاد لقلبى ولُقمتى
وبااروح معاه لبلاد كتير
من غير تذاكر بيها تخلص رحلتى
أنا أيوا أه أوقات بااطير
والشِعر ليا جناح بيمسح دمعتى
أنا لما بااكتب للقصايد بالقلم
بتكون مشاعر مش كلام
بتكون معانى جميله توصف للسلام
وبتلمسك من غير أيادي تحسها
وبتبقىّ جنه إليك وعادى تخُشها
وبتبقىّ ملكه كمان وسهل تحبها
تُطلبها إيه ؟
مـ العادى تحلم أه يابيه
والحلم فيها بسيط وسهل تحققُه
والقطر فيها بيمشى أه وهاتلحقُه
والفرح فيها يدوم سنين
مش زي فرحَك لما قلبك يسرقُه
والحرف فيها بيبقىّ جامد من حديد
وكمان يلين لجلن تحبُه وتعشقُه
إطلُب كمان
دي قصايدى ممكن تبقىّ أصلاً حَبـهَـان
تتحط فوق الأكل تظبُط حضرتُه
ولا يوم هايصبح فيها حُبك حُب هان
ولا يوم هايلمح فيها قلبك دمعتُه
معروفه كل قصايدى أصلاً بالجديد
اليوم بتاعها بيبقىّ فيه اللحظه عيد
والنبض لو شُريان وبس يدق فيه !
بقصايدى يجى كمان يزغرط ف الوريد
محتاج دكاتره كتيره تشرح نبضتي
هايلاقوا نبض القلب سارى ف كلمتي
هايقولوا إن علاجي أصلاً من حروف
حرفين وقبل الأكل فيهم فرحتى .
بقلم... محمد عسل
ليست هناك تعليقات:
إرسال تعليق