على وشها رسم الزمن
تجاعيد علامات المحن
عايشه على كسرة رغيف
والمال بيجى زى ضيف
كل اللى فاضل منها حبة كرم
على روح جميله وطيبه
والماضى تاه ومالوش حليف
كان الزمان غير الزمان
كان الامل مالى المكان
والحب كيف
كان من زمان النور خفيف
لمبه وقايده ع الجدار
دلوقتي فى عز الخريف
بقينا عايشين فى الحصار
كان الدفا كان الامان
كان الرضا بيملا المكان
بالحب عشنا سنين عجاف
ومهما زاد بينا الخلاف
كنا بسرعه بنلتقى
دلوقتي معكوس الغلاف
وعقول وماليها الخراف
وبقينا دايما نشتكى
العتمه داست فى النهار
افكار وماليها الغبار
والنور وقرب ينطفى
فين القرايب فين الصحاب
كل اللى ساد وش الغراب
والحلم قرب يختفى
امتى بقى يعود النهار
امتى هنحسن الاختيار
والظلم يعلن الانتحار
«((طلعت عامر ))»
ليست هناك تعليقات:
إرسال تعليق