مستحيل ....بقلم الشاعر / إبراهيم فهمى المحامى

 

’’’’’’’’’’’’’’’’’’’’

لو هنتعاتب عاتبنى
بس سيبنى لسكّتى
إنت إنسان تانى خالص
دنيتك غير دنيتى
ياما قلت أغفر واسامح
وانسى منك قسوتك
إنما قلبك ده جارح
الجحيم فى جنّتك
إنت إنسان مستحيل
يتولد منك أمل
نور وجودك عندى ليل
والغدر منك محتمل
ليه يا دنيا اللى اشتريته
باع وسابنى بدون تمن
داس على الحب اللى بينّا
وفاتنى عِبره للزمن
مش هفكّر فيك خلاص
هنسى قلبى لو حصل
الحكايه مش حماس
ولاّ حبل هيتوصل
إنتَ ضيّعت اللى بينّا
وانتهى بينّا الطريق
مستحيل الميّه تجرى
والحبيب يصبح صديق ،،،،،