قـصـيــد ة
--------------
أجـيـــــب لـــــك إيـــــه
-----------------------
للشاعر / محمد عبد الفضيل
---------------------------
أقولك إيه
في يوم عيدك
وأجيب لك إيه ...
وكل هنايا يا أمي
هنا جبتيه ...
أجيبلك شوق
ما يكفي الشوق
ولا بكلمه أنا ها وفيه ....
هأجيب لك زهره لون إسمك
وهارسم قمره علي رسمك
ما توفي مره يا أمي
ألم صابك كده في جسمك
وحامده الرب وبتدعيه ...
أجيب لك عمر من تاني
يزيد عمرك وأكون فاني
ومن تاني :-
قولي لي بس يا أمي
أجيب لك إيـــــه ....
أجيب لك ضحكه مفقوده
وراها الدمعه موجوده
وسايله فوق جدار أوضه
حيطان الصبر مالياها
وألمك زارها ومالها
وشاكرة الرب ما بتشكيه ...
أجيب لك .. إيه ..
ومهما جبت يا أمي
وطفت وشفت يا أمي
حنانك ثمنه مش للبيع
ولا يوفيه ذهب ينابيع
ولا قصه ولا مواضيع
حقيقه وثابته يا أمي
دماكي بتجري في دمي
حنان قلبك هنا بيرويه ...
أجيب لك إيه ؟
-------------------------------------- شبرا في 19/3/2016م -----------------
ليست هناك تعليقات:
إرسال تعليق