طالب يا امى السماح والعفو
ما وفيت ف يوم حقك
سامحينى لو جانى ف يوم سهو
او تهت ف سكه بعيد عنك
والدنيا يا امى بتلهى
ولا تسألنا ايه مالك
وحشانى يامه ف غربتى
ووحشنى حضنك وحنانك
وكتير يا امى بفتكر
سهرك معايا وبسمتك
جوه الليالى تنورى
وتطبطبى وتهننى
وتمسحى بايدك جبينى
وجريك عليا وانا بنكفى
وبعد ما خدتنى الرجوله
وخط شعر ف لحيتى
نسيتك يا غاليه
وتهت ف الدنيا
وألقيكى لسه بتسألينى
فيك ايه يا ولدى
وايه احوالك
وتحضنينى وتلبسينى توب الرجوله
وتفرحى
لما تلاقينى ف كتف ابويا
بسنده وبسندك
سامحينى يامه لو ظلمتك
يوم ببعدى
سامحينى يامه دا انتى اغلا
الكل عندى
وادينى ايدك لما ابوسها وانحنى
وسيبينى جوه حضنك ادفى واترمى
والبس مداسك تاج على راسى انا
وافرد طريقك ورد مليان بالهنا
لو غبت ياما ميت سنه
اهديكى من نبع المنى
كل الحجات الحلوه ماتوفى الحنان
منك يا امى كل شىء مليان امان
لو طفت بيكى الحرم
وشلتك على كتافى
ما اوفيكى يامه الجميل
ولا عٌمرى بيوافى
بدعى لرب السما
يحرس وجودك لنا
سعدك يكون كافى
( بقلمى احمد هلال )
اهداء الى كل ام فى عيدها
ليست هناك تعليقات:
إرسال تعليق